ಭಾರತೀಯ ಅಂತರಿಕ್ಷ ಸಂಶೋಧನಾ ಸಂಸ್ಥೆ (ಇಸ್ರೋ) ಚಂದ್ರಯಾನ-3 ಮಿಷನ್ ಮೂಲಕ ಚಂದ್ರನ ದಕ್ಷಿಣ ಧ್ರುವದಲ್ಲಿ ಯಶಸ್ವಿಯಾಗಿ ಲ್ಯಾಂಡಿಂಗ್ ನಡೆಸಿದ ಕೆಲವೇ ತಿಂಗಳುಗಳ ಬಳಿಕ, ಮಂಗಳ ಗ್ರಹದತ್ತ ಮತ್ತೊಂದು ಮಹತ್ವಾಕಾಂಕ್ಷೆಯ ಪ್ರಯಾಣಕ್ಕೆ ಸಜ್ಜಾಗುತ್ತಿದೆ.
ಈ ಬಾರಿ ‘ಮಂಗಳಯಾನ-2’ ಎಂಬ ಹೆಸರಿನಲ್ಲಿ ಪ್ರಾರಂಭವಾಗಲಿರುವ ಮಿಷನ್‌ ಪೂರ್ವಭಾವಿಯಾಗಿ 2026 ರ ವೇಳೆಗೆ ಉಡಾವಣೆ ಗುರಿಯಾಗಿಟ್ಟುಕೊಳ್ಳಲಾಗಿದೆ. ಇದರಲ್ಲಿ ಕೇವಲ ಆರ್ಬಿಟರ್ ಮಾತ್ರವಲ್ಲದೇ, ಲ್ಯಾಂಡರ್ ಹಾಗೂ ರೋವರ್ ಗಳನ್ನು ಸೇರಿಸುವ ಯತ್ನ ನಡೆಯುತ್ತಿದೆ. ಈ ಮೂಲಕ ಮಂಗಳಗ್ರಹದ ಮೇಲ್ಮೈ ಸಂಶೋಧನೆಗೆ ಭಾರತ ಹೆಜ್ಜೆ ಇಡಲಿರುವುದು ಅತ್ಯಂತ ಗಮನಾರ್ಹ ಬೆಳವಣಿಗೆಯಾಗಿದೆ.